"Алтын Дала"мемлекеттік табиғи резерваты

Ы.Алтынсарин атындағы Арқалық педагогикалық институтымен ынтымақтастық орнату бойынша келіссөздер нәтижесінде ағымдағы 2024 жылдың 24 желтоқсаны күні екі жақты келісімшартқа қол қойылды. Енді алдағы уақытта білім ордасы мен Резерват бірлесіп табиғат қорғау саласындағы түйткілді мәселелердің шешімін табуға еңбек етпек. Келісім аясында «Алтын Дала» мемлекеттік табиғи резерватының аңшы-биолог маманы жүргізіп жатқан ғылыми-зерттеу тақырыбына институттың білікті аға-оқытушысы жетекшісі болып тағайындалды. Осылайша келісімшарт алғашқы жемісін беріп те үлгерді. Екіжақты жұмысқа толағай табыс тілейміз.

Өткен 2024 жылы Мемлекет басшысы Қ.Тоқаевтің бастамасымен «Таза Қазақстан» экологиялық акциясы басталған болатын. Алғашқы кезде бес аптаға жоспарланған бұл акция өзіндік тақырыптарға ие болды. «Таза өлке», «Киелі мекен», «Жасыл аймақ», «Өнегелі ұрпақ», «Мөлдір бұлақ». Мәні мен мағынасы жарасқан бес аптада ел тұрғындары өз ауласын, тарихи-мәдени ескерткіштердің аумағын тазалап, абаттандырды. Ескірген ағаштардың орнына жаңа көшеттер отырғызып, ардагерлер мен қарт кісілердің ауласын қоқыстан тазартып, өзендер мен көлдердің жағалаулары қоқыстардан тазартылды.
        Акцияның басты мақсаты еліміздің әр аймағын қоқыстан тазарту және экологиялық мәдениетті қалыптастыру. Бастаманы халық қолдады, бүкіл ел болып ортақ үйімізді таза әрі қауіпсіз ету үшін күш біріктірді.
        Аталған акциядан «Алтын Дала» мемлекеттік табиғи резерватының ұжымы да шет қалмады. Жыл сайынғы «Парктер Шеруі» халықаралық акциясын «Таза Қазақстан» экологиялық акциясымен ұштастырып, мектептерде оқушыларға табиғатты қорғаудың маңыздылығын тілге тиек етсе, мекеме ұжымыдары мен қоғамдық ұйым өкілдері және халықпен кездесулерде экологиялық проблемалардың өзекті екендігін алдыға тартып оларды шешу жолдарын бірге қарастырып отырды.
«Таза Қазақстан» экологиялық акциясы 2025 жылы жалғасын тапты. Осы орайда аталған акцияның өрісін кеңейту мақсатымен «Алтын Дала» мемлекетті табиғи резерваты мамандары Жангелді ауданында іс-сапармен болып, ауданның бес мектебінде «Алтын Дала» резерватының мақсат-міндеттерін, атқарып жатқан жұмыстарын және алдағы жоспарларымен таныстырды. Жангелді ауданының оқушылары мен ұстаздарына Республика көлемінде өтіп жатқан «Таза Қазақстан» жалпыұлттық экологиялық акциясы шеңберінде үгіт-насихат жұмыстарын жүргізіп, табиғатты аялау, қоршаған ортаны қорғау қоғамда өмір сүріп жатқан әрбір азаматтың борышы екенін ұғындырды.

Жаңа жылда жаңа сипатқа ие болған «Таза Қазақстан» жалпыұлттық экологиялық акциясы аясында Орман шаруашылығы және жануарлар дүниесі комитетінің төрағасы Д.Тұрғамбаевтың тапсырмасына сәйкес, барлық табиғат қорғау мекемелері өздері орналасқан елді-мекендегі білім ошақтарында ағаш тұқымдарын контейнерлерге егу жұмыстарын жүргізді. Бұл іс-шараның негізгі ерекшелігі осы уақытқа дейін аймақтарда ағаштар көшет күйінде жерге отырғызылса енді оқушылардың көмегі мен күтімінің арқасында ағаштар тұқымынан бапталып өсіріледі де кейін мектеп ауласына отырғызылады. Бұл өз алдына оқушылар үшін үлкен тәжірибе және тәрбие.
Аманкелді аудандық білім бөліміне қарасты Аманкелді жалпы білім беретін мектебінде, Ә.Боранбаев атындағы жалпы білім беретін мектебінде және Ы.Алтынсарин атындағы жалпы білім беретін мектебі мен Н.Мейірманов жалпы білім беретін мектептерінде жалпы саны 300 дана Қайың ағашының тұқымын отырғызды. Мектеп ұжымы аталған іс-шараның тәрбиелік маңызы зор екендігін алдыға тартып, алдағы уақытта да осындай жұмыстардың көп болатынына сенім білдірді.